Namataan ang Tropical Depression Crising sa layong 725 kilometro silangan ng Virac, Catanduanes alas-10 ng umaga nitong Miyerkules, Hulyo 16, 2025.

Taglay nito ang lakas ng hangin na 45 kph at bugso na aabot sa 55 kph, habang kumikilos pa-kanluran sa bilis na 35 kph.

Inaasahang patuloy na lalakas si Crising at maaaring umabot sa kategoryang severe tropical storm habang kumikilos pa-hilagang kanluran sa karagatang sakop ng Philippine Sea.

Maaaring maglandfall si Crising o dumaan malapit sa Babuyan Islands o kalupaan ng Cagayan sa Biyernes ng gabi, at posibleng nasa hilagang bahagi ng West Philippine Sea pagsapit ng Sabado ng umaga.

Simula ngayong araw, mararamdaman na ang epekto ng habagat na pinalalakas ng bagyo, na magdudulot ng makabuluhang pag-ulan sa malaking bahagi ng Central at Southern Luzon, Visayas, at Zamboanga Peninsula sa buong weekend.

Pagsapit ng Biyernes, maaaring magsimula ring umapaw ang malalakas na pag-ulan sa Northern Luzon dulot ng rain bands ng bagyo.

Inaasahan ang malawakang pagbaha at pagguho ng lupa sa maraming lugar sa kanlurang bahagi ng bansa.