Magiging mas malamig ang temperatura ngayong linggo dahil sa muling paglakas ng northeast monsoon o Amihan ayon sa Philippine Atmospheric, Geophysical and Astronomical Services Administration (PAGASA) kahapon.
Ayon kay Ana Clauren-Jorda, weather specialist ng PAGASA, nararamdaman na sa Northern Luzon ang mas malamig na temperatura at inaasahang kumalat sa iba pang bahagi ng bansa, kabilang ang Metro Manila.
Pumalo kaninang umaga sa 16.4 degrees ang temperature sa Baguio City, samantala 23.4 degrees Celsius naman sa Quezon City.
Sinabi rin ni Clauren-Jorda na makakaapekto sa Northern Luzon ang shear line, kabilang ang Isabela at Aurora, at magdudulot ng ulan sa mga nasabing lugar.
