Wala pa umanong gamot kontra MPox sa Pilipinas na FDA-approved, ayon kay Dr. Arthur Dessi Roman, RITM Medical Specialist.
Aniya may mga anti-viral na pinag-aaralan sa kasalukuyan, at mga patunay na maaaaring makatulong ang ilang mga gamot.
Dagdag pa ni Dr. Roman, mayroong mga bakuna sa ibang bansa para sa Mpox pero sa ngayon ay para lamang sa emergency use, ngunit sa Pilipinas ay wala pa. Ang magagawa lamang daw ay early detection at isolation para hindi kumalat sa ibang tao, at bigyan ang pasyente ng supportive treatment.
Maaari umanong bigyan ng gamot para sa lagnat ang pasyenteng may Mpox kapag ito ay nilalagnat, gayundin ang anitibiotic kapag mayroong infection.
Saad ni Roman, ang pangunahing dapat siguraduhin ay huwag hayaang magkaroon ng kumplikasyon at bacterial infection ang mga sugat ng pasyente, at iwasang makahawak ng iba. Mahalaga rin daw ang infection prevention and control.
Matatandaang nagdeklara ng global public health emergency ang World Health Organization (WHO) laban sa mpox o dating kilalang monkeypox, at nitong Lunes lang ay inihayag ng Department of Health (DOH) na mayroon nang unang kasong naitala ng nasabing virus sa Pilipinas ngayong 2024.
Ayon sa DOH, ang bagong kaso ay isang 33 taong gulang na lalaki, at walang travel history sa labas ng Pilipinas ngunit mayroong close contact tatlong linggo bago makaramdam ng sintomas.
Mahigit isang linggo na umano ang nakalipas nang magsimulang makaramdam ng sintomas ang pasyente: nakaranas ito ng lagnat, na sinundan ng rashes sa mukha, batok, likod, katawan, singit, pati sa talampakan at palad makalipas ang apat na araw.
Ayon kay Herbosa, maaaring maipasa ang mpox sa paghawak sa kontaminadong gamit o kahit sa paglapit sa infected na hayop. Kahit sino raw ay maaaring mahawahan ng mpox sa pamamagitan ng close at intimate contact sa pasyenteng mayroong virus.
