Ayon sa Philippine Statistics Authority (PSA), hindi raw nagkakalayo ang minimum food budget ng Pilipinas na P64 ($1.12) para sa tatlong meals kumpara sa ibang bansa na humigit kumulang P123 kada araw o $2.15.

Nasa P9,581 naman ang minimum basic food amount ng pamilyang may limang miyembro kada buwan o nasa P20 kada meal, batay sa National Economic and Development Authority (NEDA).

Maraming grupo ang kumontra sa naging pahayag ng NEDA, at iginiit na masyadong mababa ang daily food budget na P320 para sa pamilya ng lima.

Ani Bernadette Balamban, chief statistical specialist ng Philippine Statistics Authority poverty and human development statistics division, ang P64 kada tao raw na food-poverty threshold ay batay sa national average ng mga presyo ng pagkain noong nakaraang taon (2023).