Masayang sinalubong ng kanilang mga pamilya at kaanak ang 2024 Paris Olympians na pinangunahan ni double-gold medalist Carlos Edriel Yulo.

Lumapag kagabi galing Dubai ang Philippine Airlines flight 888 na sinakyan ng mga atleta ganap na ika-7:07 pm sa Villamor Air Base.

Makakatanggap ang mga Pinoy athletes na sumabak sa Paris Olympics ng tig-iisang milyon mula sa Palasyo. Binigyan naman ng P20 milyon si Carlos Yulo ng Office of the President, maliban pa sa nakasaad sa National Athletes and Coaches Benefits and Incentives Act RA 10699 at travel tax exemption hanggang June 30, 2028.

Sinalubong ni President Ferdinand “Bongbong” Marcos Jr. ang mga atleta sa Malacanang upang sila ay bigyang parangal.

Ayon sa Presidential Communications Office (PCO), ang pag-gawad ng parangal sa mga atleta ay isang paraan upang mahimok ang mga kabataan na lumahok sa isports o palakasan, at upang magsilbing inspirasyon sa mga aspiring Filipino athletes na sila rin ay maaaring maging kampeon.